GNU Taler: Principis di dissen

1. Software libar/Libre

GNU Taler al scugne jessi Software libar/Libre. Pai marcjadants, il Software libar/Libre al previen il vincul cul furnidôr, ce che al vûl dî che i marcjadants a puedin sielgi cun facilitât un altri furnidôr di servizis par elaborâ i lôr paiaments. Pai paîs, il software libar/Libre al vûl dî che GNU Taler nol pues comprometi la sovranitât imponint restrizions o recuisîts. E pai operadôrs Exchange, la trasparence e je cruciâl par sodisfâ il principi di Kerckhoffs e par stabilî la fiducie publiche.

I clients a beneficiin dal Software libar/Libre parcè che chiunche al è libar di modificâ il software dal tacuin par supuartâ plateformis adizionâls. Il codiç sorzint al scugne jessi disponibil e al à di rindi facil verificâ che funzionalitâts ostîls al utent, come il tracjament o la telemetrie, no sedin presintis.

2. Protêç la riservatece dai compradôrs

La riservatece e je plui significative cuant che e ven garantide midiant misuris tecnichis, invezit di semplicis politichis. Cence un strât tecnic che al furnìs la riservatece in maniere predefinide, lis transazions finanziariis a svelin nivei no necessaris di dâts personâi o privâts. Chest al sarès vêr massime cuant che si fasin micropaiaments par publicazions online. Cussì, GNU Taler al scugne protezi la riservatece dai compradôrs par evitâ di facilitâ un control totalitari su la popolazion. Dâts privâts limitâts, come la direzion di spedizion par une consegne fisiche, a podaressin scugnî jessi tirâts dongje in base aes esigjences comerciâls e protezûts in base aes leis locâls. In chest câs, GNU Taler al scugne permeti la eliminazion di chescj dâts apene che no son plui necessaris.

3. Verificabilitât - permeti al stât di tassâ lis jentradis e di reprimi lis ativitâts comerciâls ilegâls

Stant che un sisteme di paiament al scugne rispietâ lis leis locâls par operâ in mût legâl, GNU Taler al à di jessi progjetât par rispietâ chescj recuisîts. GNU Taler al scugne furnî une trace di verifiche pai inquirents che a operin sot de leç. In plui, o consideredìn la riscuission des tassis come benefiche pe societât, e une tassazion juste e domande la trasparence des jentradis. Cussì, GNU Taler al scugne permeti aes autoritâts di tignî sot voli lis jentradis.

4. Prevignî il fraut tai paiaments

GNU Taler al scugne mitigâ lis fonts plui comunis di fraut tai paiaments. O scugnìn seguî lis miôr pratichis tal dissen dal software, lis liniis vuide di dissen di tiercis parts che a previegnin la confusion e lis interfacis utent invuiantis, e o vin di fâ controlâ a altris il nestri codiç disponibil publicamentri. In plui, GNU Taler al scugne furnî provis critografichis estesis par ducj i procès clâf par permeti a dutis lis parts di atribuî cun precision i compuartaments scorets.

5. Tire dongje nome lis informazions minimis necessariis

Ae riservatece dai compradôrs e ven dade une prioritât particolâr come part dal principi n. 2. Dut câs, ancje altris parts - come i marcjadants - a àn di vê la protezion dai dâts. In gjenerâl, GNU Taler al scugne tirâ dongje nome lis informazions minimis necessariis: i dâts che no vegnin tirâts dongje o che no vegnin plui conservâts no puedin jessi comprometûts.

6. Jessi doprabil

GNU Taler al scugne jessi doprabil pai clients no esperts, includût i utents finâi di un tacuin GNU Taler, i marcjadants che a desiderin acetâ paiaments doprant GNU Taler, e i svilupadôrs di aplicazions di tiercis parts pal e-commerce e altris plateformis. GNU Taler al scugne seguî lis liniis vuide di doprabilitât basadis su lis miôr pratichis e includi i riscuintris di esperts e utents. Il software libar/Libre al domande ancje documentazion libare/Libre par permeti sieltis informadis. GNU Taler al scugne furnî interfacis di programazion des aplicazions (API) ben documentadis par permeti integrazions cence dificoltâts tra GNU Taler e altris progjets.

7. Jessi eficient

GNU Taler al scugne jessi progjetât par jessi eficient. In maniere semplice, eficience e vûl dî mancul robis che si rompin, e e vûl dî plui transazions par secont e un impat ambientâl plui bas. La eficience e je ancje fondamentâl par che GNU Taler al vegni doprât pai micropaiaments. Par chest, ciertis primitivis costosis, come la proof-of-work, no àn di jessi dopradis di GNU Taler.

8. Dissen tolerant ai erôrs

Operadôrs malevui, erôrs di batidure, malfunzionaments dai computers, gremlins. Lis robis a van stuart. GNU Taler al scugne jessi progjetât par tolerâ il faliment di components e sistemis singui. Là che il sisteme al pues continuâ a zirâ in sigurece, al continuarà a zirâ in sigurece. Là che al scugne fermâ une operazion, altris operazions no àn di jessi metudis offline cence reson. Là che i sistemis a falissin, a àn di falî in maniere elegante. GNU Taler al scugne vê un plan par recuperâ di operadôrs malevui che a comprometin i segrets fondamentâi.

9. Favorî la concorince

Al à di jessi relativamentri facil pai concorents implementâ alternativis interoperabilis. Lis barieris par chest tai sistemis finanziaris tradizionâi a son pluitost altis e fûr dal nestri control. Dut câs, GNU Taler al scugne ridusi al minim il piês tecnic par che gnûfs concorents a jentrin tal marcjât. GNU Taler al scugne permeti un insiemi diviers di operadôrs, rompint il sisteme atuâl là che dome cualchi compagnie globâl e domine il marcjât. Un esempli di une scielte di dissen che e supuarte chest al è il dividi dut il sisteme in components plui piçui che a puedin jessi operâts, svilupâts e miorâts in mût indipendent, invezit di vê un sôl sisteme dal dut monolitic.