GNU Taler: Funzionalitâts
GNU Taler al è un sisteme di paiament che al conserve la riservatece. I clients a puedin restâ anonims, ma i marcjadants no puedin platâ lis lôr jentradis midiant i paiaments cun GNU Taler. Chest al jude a evitâ la evasion fiscâl e il riciclaç di bêçs.
Il câs di ûs principâl di GNU Taler al è chel dai paiaments; nol è pensât come un dipuesit di valôr. I paiaments a son simpri garantîts di une valude esistente.
I paiaments a vegnin fats dopo vê cambiât bêçs esistents in moneta eletroniche cul jutori di un servizi Exchange, ven a stâi un furnidôr di servizis di paiament par Taler.
Cuant che a fasin un paiament, i clients a àn dibisugne nome di un tacuin cjariât. Un marcjadant al pues acetâ i paiaments cence obleâ i siei clients a regjistrâsi sul sît web dal marcjadant.
GNU Taler al è imun cuintri tantis sortis di fraut, come il phishing des informazions des cjartis di credit o il fraut dai stornos. Tal câs di pierdite o ladrocini, al pues lâ pierdût nome il limitât impuart di bêçs restât tal tacuin.
Paiâ cun Taler
Par paiâ cun Taler, i clients a instalin un tacuin eletronic sul lôr dispositîf. Prime dal prin paiament, si scugne zontâ al salt dal tacuin la valude desiderade midiant cualchi altri mût di paiament.
Une volte cjariât il tacuin, i paiaments sui sîts web a domandin nome un clic, no vegnin mai refudâts par sbaglio dai sistemis di rilevazion dai frauts e no presentin nissun risi di phishing o di robarie di identitât.
Ricevi paiaments cun Taler
Par ricevi i paiaments Taler, un marcjadant al à dibisugne di un cont bancjari te valude desiderade. O furnìn software di supuart in diviers lengaçs di programazion par rindi la integrazion cence dificoltâts. Il backend dal marcjadant pe elaborazion des transazions Taler al pues zirâ tai locâi dal marcjadant o jessi ospitât di une tierce part.
La integrazion dal marcjadant e je semplice, e i clients a puedin paiâ i prodots cence nancje vê di regjistrâ un cont.
Scuvierç cemût che e funzione la integrazion dal marcjadant te nestre documentazion pai svilupadôrs!
Pratic
Taler al è facil di integrâ cun lis aplicazions web esistentis. I paiaments a son sigurâts in mût critografic e a vegnin confermâts dentri milliseconts cun coscj di transazion estremementri bas.
Stabil
Taler nol introdûs une gnove valude. Taler al dopre un tacuin digjitâl che al conserve monedis e furnidôrs di servizis di paiament cun conts di regolament in valudis esistentis. Cussì, lis monedis critografichis di Taler a corispuindin a valudis esistentis, come Dolars Americans, Euros o ancje Bitcoins.
Sigûr
Par progjetazion, Taler nol patìs tantis categoriis di problemis di sigurece come il phishing o la falsificazion. Gracie aes sôs funzionalitâts di sigurece, Taler nol refude mai un client legitim par vie di un fals positîf dai sistemis di rilevazion dai frauts.
Tassabil
Doprant Taler, lis jentradis dal marcjadant a son trasparentis pes autoritâts di riscuission des tassis. A diference dai contants e de plui part des valudis digjitâls, Taler al jude a prevignî i marcjâts neris. Taler nol è adat par ativitâts ilegâls.
Privât
Cuant che tu paiis cun Taler, no covente che la tô identitât e vegni svelade. Compagn dai paiaments in contant, nissun altri al pues seguî cemût che tu âs spindût la tô moneta eletroniche. Dut câs, tu otegnis une prove di paiament valide a nivel legâl.
Libar
Taler al furnìs protocoi e implementazions di riferiment che, in principi, a permetin a chiunche di zirâ la sô infrastruture di paiament, che a sedin individuis, organizazions o intîrs paîs. Stant che la implementazion di riferiment e je un GNU pachet, e restarà simpri software libar.