Ce relazion ise tra Taler e il Bitcoin o lis Blockchains?

Taler nol domande nissune tecnologjie di Blockchain e no si base nancje su provis di lavôr o altris mecanisims di consens distribuît. Invezit, Taler si base su firmis vuarbis. Dut câs, in teorie al è pussibil cumbinâ Taler cun criptovaludis come Bitcoin.

Dut câs, al sarès pussibil prelevâ monedis denominadis in Bitcoin intun tacuin Taler (cuntun Exchange adat), chest al puartarès vantaçs in confront al Bitcoin "pûr", par esempli i timps di conferme istantanis.

Dulà vegnial conservât il salt dal gno tacuin?

Il to tacuin al conserve la monede digjitâl e duncje, in definitive, il to computer al ten il salt. Taler Exchange al ten intun cont di regolament i fonts corispondents a ducj i bêçs che no son stâts spindûts.

Ce sucedial se o piert il gno tacuin?

Stant che la monede digjitâl di Taler tal to tacuin e je anonime, l'Exchange nol pues judâti a recuperâ un tacuin pierdût o robât. Propite come un tacuin fisic par contants, tu sês tu responsabil di tignîlu al sigûr.

Al è pussibil sbassâ il risi di pierdi il tacuin fasint backups o tignint il salt bas cun judizi.

E se il gno computer al ven violât?

Tal câs che un dai tiei dispositîfs al vegni sfuarçât, un malintenzionât al podarès spindi i bêçs digjitâi dal to tacuin. Il control dal to salt al podarès palesâti se il to dispositîf al è stât violât. Se une monede e je za stade spindude, nol sarà pussibil tornâ a spindile. L'Exchange (Exchange) al fâs cheste verifiche par ogni monede e duncje e rint impussibile une dople spese.

Cemût instalio un tacuin Taler sul gno navigadôr?

Visite la pagjine di instalazion dal tacuin Taler pes estensions dai navigadôrs e selezione il tacuin adat al to gjenar di navigadôr.

Cemût instalio un tacuin Taler sul gno telefon?

Visite l'app-store corispondent al to celulâr e selezione la aplicazion Taler. Tu cjatarâs colegaments su la pagjine di instalazion dal tacuin che ti vuidarà ai relatîfs app-stores.

Puedio mandâ bêçs ai miei amîs cun Taler?

Taler al supuarte i paiaments push (inviâ) e pull (ricevi) tra tacuins (cognossûts ancje come paiaments direts tra utents o peer-to-peer). Ancje se al somee che i paiaments a vegnin fats in mût diret tra i tacuins, a nivel tecnic lis operazions a passin par un furnidôr di servizis di paiament che pal solit a è obleât par leç a identificâ i destinataris dai fonts prime di permeti il completament des transazions.

Cemût fasial Taler a gjestî i paiaments tra valudis diviersis?

I tacuins Taler a puedin tignî monedis digjitâls che a corispuindin a diviersis valudis come Euros, Dolars USA o Bitcons.

Pal moment Taler nol da la pussibilitât di convertî lis valudis tra di lôr.

Cemût protezial Taler la mê riservatece?

Il to tacuin al conserve lis monedis digjitâls che a vegnin firmadis in mût vuarp di un Exchange. L'ûs di firmis vuarbis al protêç la tô riservatece e al impedìs al Exchange di savê par cuâl client e je stade firmade la monede.

Trop costial?

Il protocol Taler al permet a ogni Exchange di stabilî la sô struture tarifarie, consintint ai operadôrs di aplicâ comissions pal prelêf, pal dipuesit, pe rinovazion o pal rimbors di monedis. I operadôrs a puedin ancje adebitâ comissions pe sieradure des riservis e pai trasferiments bancjaris (agregâts) ai comerciants. I comerciants a puedin sielzi di cuvierzi cualchidune des comissions sostignudis dai clients. I coscj efetîfs des transazions a vegnin stimâts tor i 0,001 cent/transazion (cun tas di transazion elevâts, amortizâts su miliarts di transazions, escludûts i coscj di migrazion). Viôt che cheste e je une stime preliminâr; i detais a podaressin dipendi dai recuisîts di hosting e di backup de autoritât di regolamentazion e duncje a al è facil che a podaressin jessi 10 voltis plui grandis.

Taler funzionial cui paiaments internazionâi?

Il tacuin Taler al supuarte plui valudis, ma pal moment il sisteme nol supuarte la conversion tra valudis. Dut câs, in linie teoriche, al sarès pussibil creâ une entitât che e acete dipuesits intune valude e che e permet i prelêfs intune altre. Ma ben, in chest câs i ostacui normatîfs a tindin a deventâ une vore complicâts. La atenzion di Taler e je indreçade ai paiaments di ogni dì, duncje no vin in progjet di supuartâ la conversion di valudis pal prossim futûr.

Cemût si relazionial Taler cu la Diretive (Europeane) su la Monede Eletroniche?

Secont di nô, une plateforme Exchange di Taler, che e gjestìs euros, e scugne conformâsi aes regulis che a son za presintis te Diretive Europeane su la Monede Eletroniche.

Cuale bancje garantiressie la conversion tra monedis Taler e bêçs bancjaris in normâi conts corints?

L'Exchange al vignarès gjestît di une bancje o in cooperazion cuntune bancje. Cheste stesse bancje e tignarès i fonts di garanzie. Fâs câs: cheste bancje e podarès jessi une bancje tradizionâl o une bancje centrâl, tal câs di une valude digjitâl de bancje centrâl. In ogni câs, la bancje e colarès sot des normativis relativis ai servizis finanziaris. Chest al è un dai motîfs dal parcè che i consumadôrs a puedin fâ afidament su la conversion des monedis Taler in monedis bancjaris tradizionâls.

A cui varessino di ricori i consumadôrs tal câs di mancjade conversion o mancjade conformitât?

Di un pont di viste tecnic, ducj i Exchange a vegnin verificâts di un o plui revisôrs indipendents. I tacuins dai marcjadants e dai consumadôrs a segnalaran in automatic cierts problemis ai revisôrs, ma chescj a puedin ancje indicâ un metodi pe segnalazion manuâl dai problemis. I revisôrs a son tignûts a rindi lis lôr segnalazions disponibilis aes relativis autoritâts di regolamentazion o adiriture al public in gjenerâl.

Di un pont di viste legâl, i utents a puedin simpri ricori aes autoritâts nazionâls responsabilis de risoluzion di disputis che a rivuardin la gjestion dai Exchange. Pai Exchange che a operin in Gjermanie, e je la autoritât gjenerâl responsabile des controversiis (Universalschlichtungsstelle des Bundes). Sore, al è pussibil doprâ la risoluzion europeane des controversiis in rêt (viôt ODR), tant che plateforme dade de Comission Europeane, par risolvi lis controversiis relativis ai Exchange, con sede tai stâts membris de Union Europeane.

Esistino progjets che a doprin za Taler?

O savìn che tantis impresis a stan realizant progjets sperimentâls o a stan svilupant prototips che a funzionin. O stin ancje tratant cun cualchi bancje regolâr e cun diviersis bancjis centrâls. Fate cheste premesse, pal moment sul marcjât no esistin ancjemò prodots e o crodìn che in ogni câs al sarès masse adore, stant il stât dal progjet (viôt ancje il nestri gjestôr pai erôrs par vê une liste di problemis vierts).

Taler supuartial i paiaments ciclics?

Fin vuê, la nestre implementazion dal tacuin no supuarte i paiaments ciclics. Chestis operazions, là che un impuart fis al ven paiât su basis regolârs, a son in teorie pussibilis, ma cun cualchi espedient. Tal specific, i paiaments ciclics a puedin funzionâ se il tacuin Taler al è atîf e in rêt tal moment just. Sore, par vie de lôr nature ripetitive al è pussibil individuâlis e duncje al sarès pussibil doprâlis par palesâ la identitât dal utent che lis fâs, par esempli sfuarçantlu a restâ fûr rêt tal moment dal paiament e mandantlu cussì fûr timp massim. Tal ultin, il tacuin Taler nol funzione a credit e par chest motîf l'utent al varès di verificâ di vê avonde credit par fâ il paiament ciclic. Dut câs, a puedin tornâ utii e al è probabil che a vignaran supuartâts tes prossimis versions dal tacuin Taler. Ma pal moment no je une funzion fondamentâl par Taler 1.0.

Cemût funzionino lis comissions sui bonifics?

Une comission par bonific e ven aplicade dai operadôrs Taler sui bonifics in jessude, tal moment che Taler al ven doprât par meti jù fonts suntun cont bancjari. I comerciants a son invoiâts a permeti a Taler di intardâ e dopo agregâ tancj piçui paiaments intun unic bonific coletîf par ridusi lis comissions sui bonifics. Par esempli, metin un tiermin temporâl pal bonific di une setemane, al sarès pussibil agregâ ducj i paiaments fats intune setemane intun unic bonific e duncje la comission pai bonifics e vignarès aplicade dome une volte par setemane. La comission e ven gjavade dal impuart totâl bonificât.

Cemût funzionino lis comissions sui dipuesits?

Il prelêf di 5 CHF (francs svuizars) al cree monede eletroniche cun tais di 0.04 CHF, 0.16 CHF, 0.32 CHF, 0.64 CHF, 1.28 CHF e 2.56 CHF. Par paiâ 3.23 CHF al sarès pussibil doprâ lis monedis di 0.04 CHF, 0.64 CHF e 2.56 CHF, par un totâl di 3.24 CHF e cuntun rest tornât di 0.01 CHF.

Lis comissions di dipuesit aplicadis dai furnidôrs di paiament di Taler a dipendin des monedis eletronichis dopradis te transazion. Par esempli, al è pussibil che lis comissions di dipuesit a sedin plui altis par une monede di 1.28 CHF che par une di 0.01 CHF. Il to tacuin al cirarà di selezionâ in automatic lis monedis che a minimizin lis comissions di paiâ. I marcjadants a puedin proponisi di paiâ lis comissions di dipuesit fin a un limit specificât; i clients a scugnin paiâ lis comissions di dipuesit che a superin il limit che il marcjadant al è disponibil a cuvierzi. I tacuins Taler a informin i clients su lis comissions di dipuesit aplicabilis che a scugnin paiâ prime di ogni transazion.

Cemût funzionino lis comissions par mancjât paiament?

Une comission di rimbalç e ven aplicade dai operadôrs Taler sui bonifics che a tornin i fonts ai clients cuant che il tacuin Taler nol à prelevât l'impuart dopo 4 setemanis, opûr subit se al è stât doprât un sogjet di bonific che al mancje dal codiç necessari par associâ un tacuin cul bonific. La comission e ven dedote dal impuart tornât al cont origjinari.

Par evitâ di paiâ comissions di rimbalç, i paiadôrs a varessin di stâ atents cuant che a inserissin il sogjet dal bonific, e sigurâsi che il lôr tacuin al sedi online dentri un mês dal inìzi dal prelevament.

Cemût evitâ la scjadince de monede digjitâl?

La moneta eletroniche di Taler e ven emetude cuntun periodi di validitât. Un mês prime de date di scjadince, il to tacuin al varès di cambiâ in automatic ogni monede digjitâl in procès di scjadince cun gnove monede digjitâl cuntun periodi di validitât prolungât. Dut câs, se il to tacuin al reste offline par un lunc periodi, al podarès no rivâ a fâlu. Sigure che il to tacuin al sedi regolarmentri online par evitâ di pierdi bêçs par vie de scjadince!

A cui varessino di ricori i consumadôrs tal câs di mancjade conversion o mancjade conformitât?

Tal câs che i clients o i marcjadants a vedin reson di lamentâsi dal sisteme di paiament Taler, Taler Operations AG e sarà il lôr prin pont di contat. O sin simpri ricognossents pai vuestris sugjeriments di miorament e pai messaçs di erôr. Il mût miôr par segnalâju al è midiant il nestri sisteme di segnalazion dai erôrs. Il sisteme di ticket al permet di inviâ lis segnalazions in mût anonim.

Taler Operations AG e je membri dal VQF, une associazion svuizare pe garanzie de cualitât dai servizis finanziaris (Verein zur Qualitätssicherung von Finanzdienstleistungen, General-Guisan-Str. 6, 6300 Zug, telefon +41 41 763 28 20) li che i utents a puedin ancje rivolgisi tal câs di lamentelis.